Buku Aburing Kupu-kupu Kuning menika ngaturaken cariyos-cariyos bilih Gusti menika sanes Pribadi ingkang tebih saking gesang padintenan kawula. Ing ruwet rentenging ngagesang kawula tansah saged manggihi lan ngalami katresnan Dalem. Lan ing awratipun panandhang kawula taksih saged ngaturaken puji sokur ing Pangeran. Menggahing tiyang Jawi gesang sawantah menika mujudaken sastra gumelar. Buku menika ngupadi manggihaken eloking sastra endahing karohanen lan lebeting kabatosan ing gesang ingkang ketingalipun boten nyimpen kasusastran kaendahan lan kalebetan wau. Buku menika migunani sanget langkung-langkung kangge para awam ingkang rumaos garing sepen lan tebih kaliyan Gusti ing gesang padintenanipun. Cariyos-cariyos karohanen ing buku menika ngiyataken bilih tiyang saged manggihaken tentrem lan kabegjan ing tek-kliwering gesang menika. Estunipun buku menika cariyos ingkang mujudaken isbatipun Santo Ignatius bapanipun Sarekat Yesus: in actione contemplativus sembahyanga ing sajroning tumindakmu golekana Gusti ing sakabehing ubeng-ingering uripmu!