Pangangkah supados kagunan warisaning para Leluhur ingkang endah sarta mujudaken cuwilaning mutiyara Budaya Bangsa punika lestari kacandhi, ingkang tundhonipun boten gampil musna saking pangemut-emut, langkung-langkung tumrap trah Surakarta ingkang mratah sumlempit wonten pojok-pojoking Bumi Nusantara (Indonesia). Kajawi saking punika, sanadyan buku punika amung sapala nanging saestu ageng pigunanipun kangge pathokan tumrap ingkang badhe kagungan kersa mantu, lan tumrap para-para ingkang lelumban ing jagading bebrayan mawi sarana dados Juru Panitilaksana. Wondene pinangka pawitan ngrakit buku; Buku Upacara Mantu Jangkep Gagrag Surakarta. Seserepan-seserepan paparingipun Suwargi Ki Hadisoemitro, ingkang nalika sugengipun kawentar ing babagan pangertosan tata cara lan upacara mantu. Pengalaman awit kulina ngayahi pakaryan dados Juru Panjtilaksana, kaliyan nggathuk-nggathukaken pakulinan-pakulinan tata cara lan upacara mantu ingkang asring pinanggih ing wewengkon Kasunanan punapa dene Mangkunegaran Surakarta, kalarasaken kaliyan ebahing kawontenan.